Stanley Kubrick

Dr Stanley Kubrick (* 26. Juli 1928 z New York City; † 7. Merz 1999 im Childwickbury Manor bi London) isch en amerikanische Reschissöör, Broduzänt und Dräibuechautor gsi. Sini Film wärde vor allem für iiri diefi intellektuelli Sümbolik und iiri technischi Perfekzioon globt. Dr Reschissöör isch aber au drfür berüchtigt gsi, ass er jedi Szeene bis ins chliinste Detäi perfekzioniert het, und d Schauspiiler drbii vilmol bis an iiri psüchische und füsische Gränze gstoosse si.

D Haupttheme vo sine Film si gsi, ass mä dr Wirklikäit nid chönn noochchoo und wie d Menschlichkäit schiteret. Er het daas drduur usdruckt, ass alles äifach akzeptiert oder ignoriert wird und dass d Brotagoniste mit iire dunkle, innere Chreft und Driib düen kämpfe. Die wichdigste Schlagwörter im Zämmehang mit em Wärk vom Kubrick si woorschinlig Authentizidäät, Chelti, Eerlichkäit, Realidäät, Draum und Driib. Filmschaffendi und Kritiker zelen en zu de bedütendste Filmmacher vo alle Zite.